Zirtawpni atang khan Venghlui Pastor Bial Inkhawmpui vawi 40-na chu Venghlui Kohhran Biak Inah neih a ni a. Zirtawpni chhûn khan Finance Committee leh Nomination Committee an thu a, zan lamah Palai Lawmna leh Report inkhawm neih a ni a. He hunah hian kan Kohhran zaipawlte an zai.
Inrinni nileng khan Palai ten ro an rel a. Rorelnaah hian General-ah Agenda 5 a awm a, tin, Upa leh Tual Upa thlan dilna ngaihtuah a ni bawk. Kan Kohhran atangin Synod Endowment Fund atanga Zirlai harsa zual te tanpuina hi tun aia tam zawkin Synod-in pe thin tawh rawh se, tih chu Presbytery-a kal zel tura pawm a ni a. Durtlang damdawi ina doctor an indaih theih nana hma la turin Synod-a thu thehlût tura rawtna pawh pawm a ni bawk. Pentikos Ni chu Thlarau Thianghlim Thlen Ni, tia thlak rawtna, Aizawl atanga lut chu tuna kan kaldan ngai hi a tha tawk e, tiin dah a ni a. Pastor leh Pro Pastor Induction programme hi inangtlanga neih rawtna chu remtih a ni bawk.
Pathianni chawhma inkhawmah kan kohhran zaipawlte thiam takin an zai a, chawhnu inkhawmah Lalpa Zanriah Sakramen kil a ni a, zanah Bial Chairman kalchhuak Upa F. Zakhuma hnen atangin thuchah ngaihthlak a ni. Nakkuma Bial Khawmpui neih lehna tur hi Aizawl Kohhran a ni a, tuna Bial Chairman thar hi Upa Rochungnunga niin, Upa Zatlaia chu Bial Chairman elect a ni.
No comments:
Post a Comment