KTP Branch Committee vawi 11-na neih a ni

October ni 18 thawhlehni zân khan KTP Branch Committee neih a ni a, thurêl tlangpuite chu:
1) Hun hma lama KTP-in Upa F. Saibuaia in bula Sign Board a lo târ tawh chu a lo chul tak deuh avângin chei that leh ni tawh se tih a ni a. Lo buaipui tûr hian Pu F.Lalhmuchianga, Branch Treasurer leh Pu H. Lalhmunsanga, Branch Committee member-te chu ruat an ni. An ni hmalakna hian chei that leh tawh a ni bawk. 2) Teenage Nite chu kumin chhunga neih ngei nise tia rêl tawh chu lo bawhzui turin Teenage Nite Sub-Committee din a ni a. He Sub-Committee hian Teenage Nite neih hun tûr hun remchangte lo thlirin an lo ruat ang a, neih dân tûrte leh hun hman dân tûrte pawh ruahmanna an lo siam ang a, ruahmanna an siamte chu Branch Committee-in a thlir nawn leh dawn a ni. Teenage Nite Sub-Committee member-te -
Chairman : Pu H. Thangtluanga; Secretary : Nl C. Lalhriatpuii

KTP College Veng Branch-in kum 33 a tling ta!

Pathian kaihhruainain KTP College Veng Branch chuan, October ni 22 Inrinni hian kum 33 a tling ve ta! Venghlui Kohhran atangin kum 1978-ah indangin, KTP a ding nghal a; tunah chuan member 618 awmin, Venghlui Pastor Bial chhunga Branch lian ber kan lo ni ve ta.
Kumin chhunga thawhtan zan inkhawm percent 24.93% (member 142.35 per inkhawm)a ni a; 'Inkhawm Uar Kum' puan nen a inhmeh hle. Missionary chawm zat hi 6 niin, mi 4 an kal chhuak mek bawk.

Kan Branch history tlangpui chhiar duh tan hetah hruaitute pawh hetah, tin Oct. ni 23 CHallenger pawh hetah hian chhiar belh rawh.

Synod Mission Board hnuaiah thawktu 1,918 awm

October ni 20 & 21 khan Synod Mission Board an thu a, hetah hian Manipur Synod chungchang te, Cambodia-a ordained Minister rawngbawlna neih chungchangte leh thu pawimawh dang 70 chuang an rel a ni. Manipur Synod hi kum 2006 vel atang khan siam tuma hmalak ni mah se, chak taka bawhzui a ni lem lo va. Anmahni lam hian tun hnai khan, PCI Assembly leh a enkawltu Mizoram Synod thu leh hla lovin Manipur Synod hi an lo din ti tuai hman a. Synod puitling ding turin Presbytery 4 tal awm a ngaih avangin, Manipur-ah hian Presbytery 1 siam belh leh chu SMB hian a rawt a. Manipur Synod din leh din loh chungchang hi kumin Synod Inkhawmpuiah leh PCI Assembly, Champhai-a ngaihtuah tura ngaih a ni.

Synod Mission Board hnuaiah hian, missionary thawk 625; a ram mi worker 689; contract-a thawk 556 (kan member Nl. C. Lalhmangaihsangi pawh a tel) leh Office-a thawktu dangte nen mi 1,918 an awm mek a ni. Kohhran hrang hrangten Rs. 1,000/- hu anga missionary kan chawm zat belhkhawm chu 9,273 a ni thung.

Branch Day vawi 33-na lawm dawn

Branch Committee-in a lo rel tawh angin, kumin Branch Day (October 22) vawi 33-na chu kawng hrang hrangin lawm a ni dawn a. Kohhran Committee-in a phal angin, Oct. ni 20- 23 chhung hian zan lamah Pu Joseph Zaihmingthanga speaker-a hmangin Biak Inah Crusade neih a ni dawn a. Branch Day ni tak, Oct. ni 22 Inrinni tuk hian veng chhung thianfaiin hnatlang neih a ni bawk ang. Kum danga kan lo tih thin tawh angin, October ni 26, nilaini-ah thisen pek runpui neih a ni dawn bawk. Durtlang Presby. Hospital-a thawktuten thisen hi an rawn la dawn a ni.

Kohhranin Bethel a buatsaih dâwn

Presbyterian Kohhran College Veng chuan, Pavalai Pâwl bultumin Oct. ni 22, Inrinni hian Pachhunga University College ramah Bethel a buatsaih dawn a. Kohhran mi zawng zawng bethel-ah hian tel turin an sawm a ni. Chawhma dar 10:30-ah Biak Inah kim tur a ni a, dar 11-ah bethel-na hmun tur lamah a huhoa chhuah tur a ni ang.