Matthaia Group Nite

Tun Nilaini zan Programme Sub-Committee thu chuan, Group Nite neih hun tur chungchang a ngaihtuah a. Matthaia Group chu Group Nite nei hmasa ber tura beiseiin, a hun turah August 29 (Thawhtanni zan) a ruat. Group hruaitute a theih chuan hma la nghal turin a beisei a. Programme hi Group-ina a ruahman tur a ni dawn a ni.

Chawngheiin tawngtai dawn

KTP Rorel Inkhawmin a lo rel tawh, ram pum huapa member hlate puala chawnghei tawngtai neih tur chu kan Branch chuan vawiin, Thawhtanni tlai hian kan hmang ve dawn a. Neih hun tura CKTP-in a lo ruahman tawh chu Bial Programme nena a insut buai avangin a hun hi August thla ral hmaa neih nise, tiin Bial KTP chuan a rel a. A rel angin kan Branch chuan vawiin tlai dar 5:30-6:30 chhung hian kan nei dawn a, Thawhtanni zan inkhawm pangngaiin a zui ang.

Retreat cum Leadership Training neih a ni

College Veng, July 24: KTP kumtir committee-in a lo rel tawh angin kan Branch KTP, Sub- Committee leh Group Committee Member zawng zawngte huapin kum chanve intuaitharna leh leadership training chu Zirtawpni zan atanga nizan thleng khan neih a ni a. He hunah hian Rev. Remlalfaka, Lecturer, Missionary Training College chu Resource Person-a hman a ni.
Zirtawpni zan khan Intuaitharna hun hi hman a ni a. T/Upa TL Haungura, Asst. Leader chuan inkhawm a kaihruai a, Resource Person Rev. Remlalfaka’n thuchah a sawi. Inkhawmnaah hian Pathian hnena inhlantharna hun hman a ni a, hnehna puanchhuah a ni bawk.

Inrinni hian hun hnih anga hman a ni a. Chawhma dar 11:00 atanga 12:00 chhung khan Intuaitharna hun hman leh a ni a, he hun hi Pu C. Lalrinawma, Finance Secretary-in a kaihruai a, Resource Person hnen atangin Pathian thuchah ngaihthlak leh a ni a. Chawhnu hun hi dar 1:00 atang tlai dar 3:00 thleng khan neih a ni a, Pu F. Lalhmuchianga, Treasurer-in a kaihruai. Chawhnuah hian Leadership Training neih a ni a, hruaitu nih pawimawhna leh a tih tur hrang hrangte ngaihthlak a ni.

Nizan inkhawm kha Kohhran chuan hun pein, hetah hian Rev. Remlalfaka hian thuchah a sawi a ni. Retreat cum Leadership training hi a kalten hlawk thlak an ti a. Zirtawpni zan khan vengchhungah chhiat tawk an awm avang duhthusamin kal an tha lo a, mi 70 lai an tel thei a, Inrinni khan chawhmain mi 71, chawhnuah mi 68 an kal. Kal tura beisei zat erawh chu 150 a ni.

Chatuan ram pante

Pu Robert Lalduhzuala (Kum 27) s/o Pi Lalsangluri chuan ni 12.7.2011 zânah anmahni chenna in ah inawkhluma hmuh a ni.

Pu Vanlalchhawna (Kum 40) h/o Pi Lalbeiseii chuan ni 15.7.2011 zing dar 2:45 khan thin thalo avângin chatuan ram min pansan ta.

Pi Siamliani (Kum 93) Pi Thanglianchhungi nu, Pu Jonathan L.Sailo pi chu anmahni chenna inah khawsik avângin tukin Pathianni zing khan a thi.

Leadership Training & Retreat

July 22, Zirtawpni zan atanga a tûk, Inrinni nilêng hian Kristian Thalai Pawl, College Veng Branch chuan kum chanve Intuaitharna leh Leadership Training a buatsaih dawn a. Hetah hian Rev. Remlalfaka, MTC Lecturer chu Speaker leh Resource Person-a hman a ni dawn a. Group Committee member chin chu tel ngei tura ngen leh hriattir kan ni a. Hemi atan hian hun lo insiam lawk tura hriattir kan ni bawk e.

Rawngbawlin chhuak

Kan Kohhran mi Tv C. Malsawmzuala leh Pu Chalhmingthanga te telna ‘Krista Thupuangtu’ team-te chuan NE Khawdungseiah Gospel Camping chhawng hnih neiin rawng bawlna an neia, Kohhran miten kan tawngtainaah i hre reng ang u.

Missionary-in kal

Nl R. Lalmuanzovi d/o R. Sangkunga chu Orissa For Christ hnuaiah Missionary hna thawk turin a kal dawn a, hetiang rawngbawlnaa inpe kan kohhran mi an awm hi kan lawm tak meuh meuh a, Kohhranin amah thlahna thilpek chu zanin inkhawmah a hlan ang. August ni 4 hian a thawhna tur lam panin a chhuak ang a, kohhran mipui ten kan tawngtainaah i hre reng ang u.

Branch KTP Committee neih a ni

July 14 zan khan KTP Branch Committee chu Committee room-ah neih a ni a, heta thurêlte:

1. Branch Kumpuan ‘Inkhawm Uar’ bawhzuina tur leh thalaite kohhran inkhawma kan that leh zual theih nana hmalakna turte ngaihtuah a ni a. Hetiangin-

i) August thla chhungin Branch Committee ten KTP member-te tlawhchhuahna hun hman ni se, group rukah inthenin, Branch O.B. te chu group tin leader-ah awm se tih a ni a. Tin, member tlawhchhuah hunah hian tawngtai thin ni se tih a ni. Member tlawh tur bial then dan tur chu Branch Secretary ten ruahmanna an la siam ang.

ii) Branch kumpuan bawhzui nan hian hun remchangah veng dang atanga hun rawn hmangtu tur, thusawi mi emaw, zaithiam emaw sawm tum a ni a, secretary-ten a remchan dan angin an lo buaipui ang.

iii) Branch kumpuan bawhzuina chi khat atan August ni 18, zan inkhawm atangin inkhawm kal chhiar dan tih danglam a ni dawn a, member nawlpui inchhiarna bakah Group O.B. leh Group Committee member-te a hrana chhiar thin a ni tawh ang.

Kohhran kum chanve Sum Audit Report

Kan Kohhran committee pêng hrang hrangte sum lakluh leh hmanral kum chanve audit (Dec. 2010 - June 2011) neih a ni, hetiang hi audit report a ni.

Kohhranpui
	Lak luh	Hman ral	Balance
Tualchhung	3,210,004	724,599	2,485,405
Bank account	2,434,782
Synod Sum	2,995,705
Kohhran Hmeichhia
Lakluh	Hmanral	Balance
194,108	92,845	101,263
Kristian Thalai Pawl- KTP
Lakluh	Hmanral	Balance
363,891	301,844	62,047
Ramthar
Lakluh	Hmanral	Balance
660,602	548,149	112,453
Masihi Sangati
Lakluh	Hmanral	Balance
12,009	8,519	3,490
Pawisa fai kuta awm
50,623

Challenger Issue 28

Challenger Issue No. 28, July ni 3, 2011 chhuak chhiar duh tan hetah

Health and Hospital Sunday

Vawiin hi Mizoram puma Presbyterian Kohhran ni pawimawh, Hospital leh Health Sunday a ni a, Mizoram pumah he ni hi serh a ni ang a, chawhnu leh zan inkhawmah te hun hman a ni ang.

Hospital Sunday hi kum 1928 atang khan hman tan a ni a, kum 1981 atang khan July Pathianni hmasa ber hi ni bik atan hman a ni ta a ni.

Kum 1985 Synod Inkhawmpui thu angin 1988 atang khan January Pathianni hnuhnung berah Phâr Pathianni (Leprosy Sunday) hman thin a ni a (Gen. 27). Kum 2004 Synod chuan phâr pual chauh ni lovin natna dangte pawh huamin ‘Health Sunday’ tiin a thlâk ta a (Gen. 3). Kum 2006 atang khân Health Sunday hi hman tan a ni.Hospital Charity Fund atan a ni ang.

Hospital-in kum 2010 - 2011 chhunga a sum hmuh zawng zawng chu Rs. 16,22,05,806.60 a ni a, hemia Rs. 1,24,30,000.00 chu Synod Grant a ni a, Rs. 14,73,42,280 hi Hospital-in a dehchhuah a ni a, a bak Rs. 24,33,526 hi thilpek a ni. Hemi kum chhung veka hman ral chu Rs. 16,16,28,991 a ni a, a hming chuan Rs. 5,76,815 hman bang a la awm a ni. Kum 2001-ah SEC-in Hospital chu thawktu hlawh leh mamawh dangte intum tura a lo ruahman angin tunah hian hlawh leh nitin mamawh chu a thawkchhuak thei tawh a, Synod Grant hmanna hi chu in sakna, khâwl leina leh rethei tanpuina - Charity Fund atan a ni. Charity Fund-ah Rs. 46,16,841 zet hman a ni chungin 31st March, 2011 account khar kha chuan damlo awm man pe thei bat tlingkhawm hi Rs. 1,49,61,777 a ni.

Damdawi In chanchin Tlangpui
Khum awm zat
Damdawi Ina	Hospice	Total
300	20	320
Thawktu nghet awm zat
Doctor	Nursing Staff	Thawktu dang	Total
27	105	107	239
Thawktu nghet lo awm zat
Doctor	Nursing Staff	Thawktu dang	Convenant year	Total
3	64	41	31	139

Tawngtai pui ang u

BD Zir tum...

Kan member Tv. Lalhmangaihzuala S/o H. Lalremliana chuan Allahabad Bible Seminary-ah Bachelor of Divinity zir tumin, nimin khan Allahabad panin Aizawl a chhuahsan a. Test la nei tur a ni a, a hlawhtlin ngei theih nan i tawngtaipui ang u.

Rawngbawla chhuak kal chhuak

Rawngbawla chhuak turte:-

1. Pu Chalhmingthanga leh Tv. C. Malsawmzuala te team, Krista Thupuangtu Team te chu NE Khawdungsei-ah rawngbawl nei turin nimin khan an chhuak.
2. Nl. Lalmuanzovi D/o R. Sangkunga chu Orissa for Christ hnuaiah missionary-in a kal dawn a. A kal hun tur hi la tihchian tur a ni. Kohhran mipuiten i tawngtaipui ang u.