Branch KTP Committee neih a ni

July 14 zan khan KTP Branch Committee chu Committee room-ah neih a ni a, heta thurêlte:

1. Branch Kumpuan ‘Inkhawm Uar’ bawhzuina tur leh thalaite kohhran inkhawma kan that leh zual theih nana hmalakna turte ngaihtuah a ni a. Hetiangin-

i) August thla chhungin Branch Committee ten KTP member-te tlawhchhuahna hun hman ni se, group rukah inthenin, Branch O.B. te chu group tin leader-ah awm se tih a ni a. Tin, member tlawhchhuah hunah hian tawngtai thin ni se tih a ni. Member tlawh tur bial then dan tur chu Branch Secretary ten ruahmanna an la siam ang.

ii) Branch kumpuan bawhzui nan hian hun remchangah veng dang atanga hun rawn hmangtu tur, thusawi mi emaw, zaithiam emaw sawm tum a ni a, secretary-ten a remchan dan angin an lo buaipui ang.

iii) Branch kumpuan bawhzuina chi khat atan August ni 18, zan inkhawm atangin inkhawm kal chhiar dan tih danglam a ni dawn a, member nawlpui inchhiarna bakah Group O.B. leh Group Committee member-te a hrana chhiar thin a ni tawh ang.

2. Activities calendar-a lo dah tawh Group tinte Group Nite neih tur chu Programme Sub-committee lamin a hun tur leh neih indawt dan tur ruahmanna an lo siam ang a, Group lamin Programme hman dan tur erawh an duang ang.

3. July ni 22 zan atanga ni 23 chhun nilengin Group Committee Member-chin te tan Retreat cum Leadership Trainning neih tur a ni a, resource person atan Rev. Remlalfaka, Lecturer, MTC chu sawm a ni. Activities calendar-a lo dah tawh, ‘Kum chanve inhlan tharna’ neih tura tih chu he hun hman tur hian a keng tel nghal ang.

4. Activities calendar-a lo dah tawh Group hrang hrangte sum kum chanve audit chu July ni 24, tlai dar 3:00-ah Gospel Centenary Hall-ah neih tur a ni a, auditors atan Branch KTP Treasurer leh Finance Secretary-te ruat an ni.

5. KTP member Nl R. Lalmuanzovi d/o R. Sangkunga chu Orissa For Christ hnuaiah Missionary tura Orissa State-a kal dawn avangin amah thlah nan Rs. 1,500/- pek tura rel a ni.

6. Kum tira lo rel tawh Kohhran zaipawl a hla zir tha ber/kal tam ber Group hnenah lawmman atan Rs. 500/- pek nise tih a ni. Hei hi kum chanve hmalam bik a ni a, kum tawpah kum chanve hnu lam kal tha Group pek a ni leh ang.

7. Central KTP atanga ngenna kan hmuh ‘Biak In thleng phak lote puala chaw nghei tawngtai rual’ chu July ni 25, tlai dar 5:30 - 6:30 chhungin neih tur a ni a, inkhawm pangngai programme erawh tih danglam a ni lo vang.

8. Hmeichhe humsual daite pual a Gospel Camping Central KTP-in a buatsaih tur tanpui nan Rs.1000/- Branch hmingin pek nise tih a ni.

9. Central KTP Gen. Secretary hnen atanga lehkha hmuh HIV/AIDS dona kawnga hmalak dan tur hriattirna chu a bawhzui nan thupui zir hunte siam nise, a hun tur leh programme-te chu Programme sub-committee lamin lo ruahman se tih a ni a, hmalakna tur dang an rawn siamte erawh chu hun dangah bawhzui dan tur ngaihtuah that leh a ni ang.

10. Synod Bookroom Manager hnen atanga Synod Bookroom lehkhabu neih tharte chanchinbu lam a puan zar sak tura ngenna lokal chu an ngenna ang a tihsak tura rel a ni bawk.