BRANCH SPORTS 2010 TAN TA

Kristian Thalai Pawl College Veng Branch Sports chu August ni 14, inrinni chawhma dâr 10:30 khân Branch Leader Tv. R.Lalhmunsanga chuan flag pawtpharhin a hawng ta! Pu F. Lalhmuchianga, Finance Secretary-in Group Leader-te oath taking a neihpui a. Member kal dan inchhiar a ni a, hetiang hi Group tinte kal dan a ni:- Mat- 41, Mk 42, Luk- 43, Joh- 32. Inchhiar laia thleng hmanlo engemawzah an awm bawk.
Opening match (Football) chu Branch Committee Memberte leh Ex-Br.Comm.Member-ten mins.15-15 an khêl a, Br.Comm. Memberten 4-1 in hruaitu hlui an hneh lo! Upa Lalmanliana, Pu C.L.Ramdinthara, Pu C. Zakima-ten hruaitu hlui tân goal an thun a, Br.Fin.Secy-in goal 1 hi a thun ve hrâm a ni. Field sîrah kan hruaitu hluite lo tanin U Zobawihi a au ring hlê a, an captain Pu C. Lalrosanga a fit tawp!!! Kan B.D. tlangvâl leh goal khungtute hi in-fit lo berte an ni a, an &$#@* hial!
Hmeichhe Volleyball khelh a ni a, Luka Group an champion! Silver- Matthaia, Bronze- Marka & Johana Group. He mi nia intihsiakna pui leh hmuhnawm ber chu Strongest Man

Thunun lai mi 18 lâkluh an ni

August ni 18, nilai zân inkhâwmah Bialtu Pastor C. Sangliana chuan thunun lai mi 18- nupa tuak 7 leh mi 4 a lalût a, 7th Day Adventist Kohhran mi 3 a lâwmlût bawk. Thunun 1 an awm hlauh a ni.
7th Day atanga a lawmluh te chu:- Pi Rosalind Lalramthari leh a fanute- Esther Lalruatfeli & Zorempuii te an ni a, Pi Rosalind-i hi baptisma a chantîr nghal a, thunun a ni nghal bawk.
Thunun lâkluhte chu:- Pu Lalduhsaka te nupa, Pu T. Ramthanga, Pu Lalremsanga te nupa, Laltlanthangi, Pu Reuben Vanrambeiseia te nupa, Pu K. Lalmuanawma, Pu David Zosangliana te nupa, Pu Lalengmawia te nupa, Lallawmkima, Pu L.T.Mawia te nupa leh Pu Ramnunsanga te nupa te an ni.

KTP Branch Sports photos (2010)

College Veng Pavalai Pâwl Hruaitute

August ni 15, Pathianni tlai khân Kohhran Committee Room-ah Pavalai Pâwl hruaitu turte thlan an ni a, anni hian Committee Member tur an ruat nghâl ang. Hmalâk dan tur hrang hrangte sawiho nghal a ni bawk. Hruaitu atâna thlante:-
Chairman : T/Upa H. Rosema
Vice Chairman: Pu C. Zakima
Secretary: Pu K. Zohmingthanga
Assistant Secretary: Pu Malsawma Chhangte
Kohhran aiawh: Upa F. Zakhuma

LITERATURE NITE A HLAWHTLING

Ruahman lâwk tawh angin, August ni 16 thawhtan zânah Gospel Centenary Hall-ah, Synod Bookroom ten LITERATURE NITE min rawn neihpui a. Bookroom hian Rs. 13,479/- man lehkhabu an hralh!
Inkhâwm hi Tv.Rochungnunga, Literature Sub-Comm.-in a kaihruai a, Tv. H.Vanlalhriatzuala, Literature Sub-Comm. Member-in tanna hun a hmang. Tv.Lalniliana, Synod Bookroom Manager-in thuchah tawi a sawi a; Upa Dr. Laltluangliana Khiangte-in thu a sawi. Kan Kohhran member Pu B. Thangdailova lehkhabu ziah 'Riakmaw' tih chu Upa Dr. Laltluangliana Khiangte-in a tlângzarh nghâl a, he copy hi Synod Bookroom Manager a present a ni. Pu Tluangtea hian 'Lal hla' tih thupuia hmangin lehkhabu ziah leh chhiar kawnga fuihna thu a sawi a, a lehkhabu tihchuah pathum chu Branch KTP min present a, Br.Leader Tv.R.Lalhmunsangan a dawng . A thusawi tlângkawm nân
intiamna kan neih bâkah hlado kan chham rual bawk Synod Bookroom Manager hian hun tâwp changin LCD Projector hmangin- Synod Bookroom lehkhabute chanchin tawi sawiin presentation a nei a, dâr 9:30-ah inkhâwm kan bâng. Inkhâwm hi mi 166 kan ni (Mt. 32, Mk. 35, Lk. 31, Joh. 27, Br.OB- 5& Midang 35).
Synod Bookroom thawktute hi dar 6:15 vêlah an rawn thleng a, Hall kawtah dawhkan sei pali hmangin an lehkhabu ken - chi hrang 150 chuang chu an pho a ni. Inkhâwm tan hma atangin lehkhabu lei an awm tan a, an lûn hle. An hralhchhuah zawng zawng hi Rs. 13,479/- man a tling.

Hna hmu thar

Marka Group Committee Member, Tv. Isaac C. Lalrempuia s/o C. Lalsâwmliana (Upa Bial 4-na) chu Aug. ni 13, 2010 tlaia MPSC-in ASSISTANT interview result a tarchhuahte zîngah panga (5)-na niin a tling a. Kan lawmpui takzet a ni.

Isaac-a hi June ni 1, 1988-ah a piang a, tûnah kum 22 mi chauh a ni a, MPSC hna lâk tawhte zîngah a naupangber pâwl nia hriat a ni.

# August ni 15 chhuak Challenger hetah

Branch Committee vawi 12-na neih a ni

August ni 12, 2010 ningani zân khân KTP College Veng Branch Committee vawi 12-na chu Committee Room-ah neih a ni a, member 16 an kal.
Thurêl thenkhatte:-

1. Seminar-a tel tur: Aug. ni 26 ningani chhûna 'Sex Video & Pornography' tih thupuia hmanga Synod Social Front-in Synod Conference Centre-a seminar a buatsaihah, kan branch aiawhin Tv.Lalmawizuala Tochhawng, Br.Comm.Mem. a kal ang.
2. Boys' & Girls' Hostels nên Jt.Service: October ni 4 thawhtan zân inkhâwmah, PUC Boys' & Girls Hostel-te nên Biak Inah Joint Service neih tûra rêl a ni a. An remchân dâwn leh dâwn lohte, hun hman dân turte chu Secretary-te kutah dah a ni.
3. Bawngkâwn Br.nên Jt.Service: October ni 18 thawhtan zânah Bawngkâwn Br. KTP ten min rawn tlawh lêt an tum a. Decoration Sub-Comm.-ten banner lo buaipui se, Refreshment-in ei leh in tur lo buaipui se tih a ni a. Inkhâwm hruaitu-ah Pu F.Lalhmuchianga, Br.Fin.Secy chu ruatin, Solo, Male Voice & Short Play neih nise tih a ni bawk. Hêng item nei turte chu Prog.Sub-Comm.-in Branch Sports atangin an lo thlang ang.
4. Blood Donation: Aug. ni 16 thawhtan nia Br.YMA-ten Platinum Jubilee denchhena Blood donation a neih turah a remchângte chu thisen pe tura insâwm nise; Branch Activities Calendar-a dah a nih angin, Branch Day denchhenin Durtlang Damdawi In tân Oct. ni 16 inrinni-ah Blood Donation neih nise tih a ni.

Branch Secretary-in Aug. ni 7-a Bible Study-ah Rs. 2,670/- kan sên thu,etc.te, Branch Sports atân Rs. 4,700/- kan hman tawh thu te, Challenger & Group kum chanve sum audit leh Evangelical Cell hmalâkna te a tarlang.

LITERATURE NITE & WEEK

Literature Sub-Committee, KTP College Veng Branch-in ruahmanna a lo siam tawh angin, August ni 16 thawhtan zân khian LITERATURE NITE neih a ni dâwn ta! Hemi hunah hian Synod Bookroom thawktuten hun an rawn hmang ang. Upa Dr. Laltluangliana Khiangte-in thu a sawi ang a, Tv.Lalniliana, Manager, Synod Bookroom-in slide show a nei bawk ang. Zaithiam rawn hruai an tum bawk. Literature chungchângah zawhna leh chhanna hun a awm ang.
Hemi zân hian kan Kohhran member Pu B.Thangdailova lehkhabu ziah Riakmaw tih chu tlângzarh (release) tur a ni bawk. Hei Hi Pu Tluangtea (Upa Dr.Laltluangliana Khiangte) published a ni.
Synod Bookroom thawktute hian an lehkhabu zawrh leh thildang remchângte an rawn keng dâwn a, Gospel Centenary Hall kawtah an inpho ang. Hemi zân atân bîk hian 10% discount-in a lei theih dâwn a ni.
August ni 16-22 chhûng hian Literature Week hman a ni ang a; hemi chhûnga lehkhabu chhiar tam ber pathumte hnênah lâwmman pêk an ni ang. Lehkhabu chhiar hming leh phêk zât nên in-report tur a ni ang.

LÂWRKHÂWM

1. Nilai zân inkhâwm: Kohhran serh leh sâng tihna hun- nilai zân inkhâwm (Aug. ni 11) khân Bialtu Pastor C. Sangliana chuan, Tv. Immanuel Lalramzauva chu baptisma a chantîr, ani hi UPC (Mizoram) atanga Presbyterian Kohhrana inpe a ni. Nl. Laltlanmawii d/o Thangluaia- thunun lai chu lâkluh a ni bawk.
2. Pavalai Pâwl chungchâng: Nilai zân inkhâwm bânah, T/Upa H.Rosema inah Pavalai Pâwl din tawh kalpui dân tur ngaihtuah a ni a. August ni 15 tlai dâr 3-ah Junior Deptt. Hall-ah, Pavalai rualte insâwm khâwmin kalphung turte duan leh hruaitu turte inthlan a ni ang.
3. Evangelical Cell hmalâkna: Camping chhuakte inah inkhâwmna neih kual thin a ni a, inrinni (Aug. ni7) zân khân vêngchhûng hmun 2- Biak In varandah leh Thlânmual atangin Pathian thuchah puanchhuahna an nei. Pathianni tlai khân Aizawl Civil Hospital-ah damlote an tawngtai bawk.
   
4. Black Day: Nimin (August ni 10) khân, India rama hnam hnuaihnung- Dalit Kristiante chuan 'Black Day' -ah puangin hun an hmang. Scheduled caste theuh theuh, Kristian an nih avânga Hindu S.C.-te chanvo ang an neih theih loh avânga huaihawt an ni. Hetah hian chhiar belh la...

Kristian Chhûngkaw Committee hmalâkna

Campaign/ Crusade: August ni 7, inrinni zân, ni 8 Pathianni chawhma leh zân, leh ni 9 thawhtan zânah te, Kristian Chhûngkaw Committee ruahman angin, Rev. C. Chanchinmawia (Bawngkâwn Chhim Vêng) ruaiin Kristian Chhûngkaw Campaign neih a ni a. A hlâwkthlâk khawp mai. Pathianni chawhnu hi a taksa lam chak vak loh avângin thusawina a nei thei lo va, Pu C. Lalrosangan Kristian Chhûngkaw lam hawi thuchah a sawi a ni.

Chhûngkaw zân: August ni 13, zirtâwp zân hian 'Chhûngkaw Zân' hun siam a ni a. Zân dâr 6:30-7:30 chhûng chu chhûngkaw member-tinte mahni ina awmin, Chhûng inkhâwm neiin hun hman tûr a ni dâwn a. Kristian Chhûngkaw Committee-in hemi huna chhiar tur lo buatsaih tûra a tih- Pu C.Lalrosanga thu ziak (Kohhran Committee ennawn) chu chhiar tûra beisei kan ni bawk.

THU THAR

1. PAVALAI PÂWL DIN DÂWN: August ni 6 zirtâwp zâna Kohhran Committee neih chuan, pavalaiho-in Pavalai Pâwl din ve an rawtna chu a pawm ta a. He pâwl kaihruai tur hian Upa F. Zakhuma leh T/Upa H. Rosema chu a ruat nghal bawk. He pâwl din chungchâng hi KTP Branch Committee-ah tum hnih sawi a ni tawh nghe nghe a, he pâwla tel awm mite biak râwn an ni bawk. Kohhran tam taka tangkai leh pâwl chak tak, Pavalai Pâwl din a ni dâwn ta hi thil lâwmawm tak a ni.
2. BIBLE STUDY NEIH A NI: Branch Committee-in a lo rêl tawh ang leh, Kohhran Committee-in a lo remtihpui tawh angin, Aug. ni 7 inrinni chhûnah Branch member huapin Bible Study neih a ni a. Branch Comm. beisei ang lo takin member an kal tha lo hlê. Rev. R.Lalrosiama, ATC Lecturer-in Bible Study hun hi min neihpui a. Dâr 10:30 to 11:30 A.M.-ah 'Pathian Thu Zir Hi' tih paper a buatsaih chu zirho a ni a. Chawhnu lam dâr 12:10 to 1:50 P.M. chhûngin Timothea hnêna Tirhkoh Paula Lehkhathawn Pahnihna zirho a ni. A history-te a sawi hnûin, member-ten mahnia Bible chhiarin a thu tum nia ngaihte sawi chhuah a ni a. Resource Person-in a khai khâwm leh a ni.Branch Comm. chuan mi 130 vêl tal chu he huna tel tura a beisei laiin, mi 41 (sawmli pakhat) chiah an tel thung. Member kal dân heti angin:- Br.Comm.= 18; Mat.= 4; Mk.=8; Lk.=6 & Joh.=5.
3. Pathianni chhuak chanchinbu- Challenger Issue 32 (Aug.ni 8) hetah chhiar rawh le...
   

Lawrkhâwm

1. August ni 14, inrinni chhûn atanga Branch Sports neih turah inbuatsaih chhoh mêk zêl a ni a. Ni 5 & 6 (ningani & zirtawpni) zânah te major items neih huna hâk tur Branch Jersey thuiin hnatlâng neih a ni a. Sports Sub-Committee Member-te bâkah, hêng mite hian an thui- Nl.H.Lalchansangi, Nl.H.Lalrinmuani, Nl. K.Lalruatkimi, Nl. Baby Lalhmunsangi, Nl. H.Lalthanpari, Nl. Rozampuii & Nl. Lallianpuii te. Practice form ang chi-in a awlsam thei ang bera buatsai/ thui a ni.
2. August ni 7, inrinni chhûnah Bible Study neih a ni dâwn a, Rev.R.Lalrosiama, ATC Asst. Professor-in hun a rawn hmang ang. II Timothea thu zirho a nih bâkah, Pathian Thu zir dân tur leh kalhmang sawiin hun a hmang bawk ang.
3. August ni 9, thawhtan zân KTP Inkhâwmah Rev. C.Chanchinmawian, Kristian Chhûngkaw Campaign neih chhunzawmin thuchah a sawi ang.
4. ATC B.D. Final exammination result a chhuak a, an ti tha hlê:- Grade B+=4, Grade B=24, Grade B- = 8, Grade C+ =3, t.t. = 39- an passed. Synod chanchinthar hetah.
5. August ni 2 thawhtan zan inkhâwm- mi 120 an ni, hetiangin:- Mt- 23, Mk- 34, Lk- 24, Joh- 30, Br.O.B.-6, Midang-3, Total: 120; thawhlawm Rs. 1,058/-. Hemi zâna thuchah chu hetah hian chhiar la
   

Synod Office Building hau tak!

July ni 7, 2007 zîng dâr 7 (7/7/07)-a Synod Office building thar lungphûm ni tawh chu sak zawh tura hun tiam, November 2010-ah luah hman a ni lo mai thei!
A tira ruahman lâwk ang chuan chhâwng thuma sâng niin, a sakna sênso atân hian Rs.2,46,00,000/- ruahman a ni. Chhâwng 5 (nga)-a sâng-a sak a ni ta thung a, tûn (4/8/2010) thleng hian chêng nuai 500 vêl hman a ni tawh a. A bang hi atîra cement tûra ruahman chu aluminium sheet (ready-made phêk 1 Rs. 6000 vêl man)-a siam a ni leh ta zâwk a, Kolkatta lam atangin hemi bel tur hian an rawn kal a ni. A hma lam an la zo lo va; a chhûng rawng hnawih tura buatsaih mêk a ni. Phutin hmangin tum 3 an hnawih chhuah vek hnûah rawng pangngai hnawih chauh a ni ang.... Office bungrua- chair, etc. pawh chah thlen a ni tawh a, chêng nuai sawmthum bawr vêl man niin an sawi. He hna enkawltu zînga mi (manager ni lo) Pu Hminga chuan, luah tan hun tura beisei- November thlaah luah hman a ring chiah lo! He hna viltute chuan eirûk awm lo niiin an sawi a, a tha thei ang ber chi hmanga sak a nih chhoh tak avâng leh, hming that leh fak hlawh duh avângin hlêp um ber lo va sak an duh avângin a senso tam ta niin an sawi bawk. An sawi ang hian building sak hi a that hmêl hle mai a, a mawiin a nalh a, Aizawl khawpuia building sak that ber leh mawi ber pâwl a ni dâwn a ni.
Synod Office building Architect hi Pu Lalbiakmawia Ngente niin, Structural Engineer chu Pu Zoramliana a ni. June ni 21, 2007-ah sak tan a ni a, 80% vêl chu sa zo tawh angah an inngai.

Group Theme Songs'

Vawiin (August ni 1) Fellowship-ah Branch Sports huna Group tinte 'Theme Song' tur chu Group Leader-ten an pawt a. Hêng an hla pawh fuhte hi Football, Basketball, Volleyball, etc. khelh dâwnah play thin a ni dâwn a ni.

Matthaia Group: 'Silfaina'
Marka Group: 'Lalpa tawtawrawt a rik hunin'
Luka Group: 'Hringnun kan zin kawngah hian'
Johana Group: 'Ka zinna ram khawvêl thiante (Danglam ngailo)'

Thlai Thar Thawhlawm

Naupang Sunday School chuan vawiin (August ni 1) chawhma khân Thlai Thar Thawhlawm an nei a. A remchâng apiang ten mahni thlai tharte leh pawisa keng khâwmin, Sunday School bânah thlai tharte hi zawrh a ni. Inkhâwm bân lai taka ruah a sur nasat avângin, thlai thar zawrhte pawh an hralh zo hma hlê a ni.
Department tin atangin zirtirtu pahnih zêl ten thlai thar lâkkhâwm leh a hralh hna hi an buaipui a, NPSS lam Secretary Pu Lalthlamuana Pautu-in a enpui a ni. Hêng thlai leh thei hralhna man leh pawisa thawhte nên Rs. 3,930/- hmuh a ni.