Ramthar Ni

31 (Nilaini) hi Ramthar Ni a ni a, Mizoram Presbyterian Kohhran tan Ni pawimawh bik a ni. A chhan chu Mizorama Presbyterian Kohhran rawn dintu Rev. David Evan Jones (Zosaphluia) Mizorama rawngbawl tura a lo thlen ni a nih vang a ni.

Kum 1972-a Mizoram Synod Inkhawmpui chuan, Synod Ramthar Board-in, ‘August ni 31, Pu Zosaphluia Mizorama a lo thlen ni hi Synod Ramthar Ni atan hman ni se’, tia a rawtna chu pawmin kum 1973 atang khan August 31 chu Ramthar Ni atan hman tan a lo ni ta a ni.

Fehchhuak leh Kohhran News

Kan member Pu Reuben VR Beiseia, Nl. Lalhmangaihi Sailo, Tv. Zohmingthanga, Nl. Remruatfeli Chhangte te telna Soldier For Christ chuan Chawngte P-ah rawngbawlna an nei dawn a. Zirtawpni tlai khan an rawngbawlna tur hmun panin an chhuak. Kan tawngtainaah kan hre reng dawn nia.

Nilaini zan khan Baptisma chang thar mi 6 an awm a, kohhran dang atanga kan kohhrana rawn lut, baptisma chang pakhat a awm bawk.

August Thla Faith Promise

HIV/AIDS-a harsatna nei tan

CKTP-in min ngen angin kan Branch/Veng huam chhunga HIV/AIDS chungchanga mawhphurna la bik deuh turin Tv. Rochungnunga Branch Committee ruat a ni a. HIV/AIDS chungchanga harsatna emaw zawhna nei chuan a hnenah emaw, phone no. 8974772906/9862658082-ah emaw, achunga2@gmail.com ah emaw biak pawh theih reng a ni.

Inkhawmpui inbuatsaih

Naupang Sunday School inkhawmpui a hnai chho zel a, Department hrang hrangte pawh intihsiakna tur zirin an bei ngawrh tan hle. Kar kalta chhung khan Dept. tam tak chuan zing karah intihsiakna tur an zir a, Inrinni khan nilênga zir a ni bawk. Sunday school inkhawmpui inpuahchah a tul avang hian KTP Fellowship pawh neih rih loh a ni.

KTP member intlawh

Tunlai hian kan Branch KTP member-te Branch hruaituten an tlawh chhuak mek a. Branch hian kumin hian Inkhawm Uar a puang a, hemi bawhzui nan hian intlawhchhuah hi neih a ni. Tin, Branch member hmun danga awm chhuak turte hruaitute hnena inhriattir theih thin nise a duhawm hle ang.

Tleirawl Chawhnu Inkhawm sports

Pathianni Tleirawl Chawhnu inkhawmte chuan Aug 7, Pathianni chawhnu atang khan sports an nei tan a. Field items leh indoor items hrang hrang tih a ni tawh a, eng emaw zat tih tur a la awm. Zirtawpni zan khan Debate, Solo leh Duet hmang tein inelna neih a ni a, mi eng emaw zat hemi zan hian an inkhawm a, tun Ningani zan hian sports hi neih chhunzawm leh a ni ang.

Pem lehkha chhiar

Tun Nilaini zân inkhawm khan kan kohhranah chhungkaw Pathum pem lehkha chhiarchhuah a ni a, Pu C.N Sailo te chhungkua member pathum, Pu Lalthakunga te chhungkua member pali leh Pu Vanrotluanga te chhungkua member panga te an ni. Kan kohhran tan mi tangkai tak an nih kan beisei.

Aizawl East Presbytery Meet zo ta

Aizawl East Presbytery Meet chu Zirtawpni zan atang khan Salem Veng Kohhran Biak Inah neih tan a ni ta a. A thlengtu Kohhran Biak In leng loin Zirtawpni zan hian inkhawm an awm nghal. Hemi zan hi Report inkhawma hman a ni a, Aizawl East Presbytery huam chhunga Bial KTP hrang hrangte chanchin report ngaihthlak a ni. Kan Branch atang pawhin mi eng emaw zat an inkhawm thei.

Inrinni nileng khan seminar neih a ni a, chawhmaah ‘Hruaitu Mawhphurhna’ tih thu Upa Lalrinmuana, CKTP Gen. Secretary chuan a sawi a, chawhnuah Pu Lalnghinglova Hauzel, CKTP Comt. Member hnen atangin ‘Thalaite leh Tunlai Khawvel’ tih ngaihthlak leh a ni. Nizan khan Rev. Zosangliana Colney, Executive Secy. i/c KTP hnen atangin Meet thupui ‘Thalaite Kohhran Nghahfâk’ tih chu ngaihthlak a ni a, a hlawkthlak hle.

Inrinni zan atang khan Speaker Rev. Zosangliana Colney hnen atangin thupui - 'Thalaite - Kohhran Nghahfak'tih ngaihthlak tan a ni. Pathianni chawhma, chawhnu leh zanah te Meet thupui hi ngaihthlak chhunzawm a ni a. Chawhnu inkhawmah hian kan kohhran zaipawlte an zai.

Chawhma, chawhnu leh zan inkhawm banah te inpawlhona neih a ni a, an hall a lian vak lo bawk a, an khat thei hle.

Inrinni khan Pathianni Tleirawl Inkhawmin sports an neih avangin Branch Committee member engemaw zat chu seminar-ah an tel tluan thei lo va, Pathianni hian naupang inkhawmpui tur atan inbuatsaihna kal chhoh lai a nih avangin zirtirtu eng emaw zat an kal lo bawk. Salem Veng Biak In hi a lian vak lo va, kawtzawl (bathlar) a zau thung a, Pathianni zan khan bathlar leh hulhliapa leng lo inkhawm an awm. Inpawlhona lamah item nei tura tih ten thiam takin an ti a, an fakawm hle. Presbytery Meet hi hi kum khat dana neih a ni a, kum 2013-ah neih leh tur a ni dawn a, a thlengtu tur la ruat loh a ni. Venghlui Bial emaw, Bethlehem Bial emaw, ITI Bial emaw te dawng thei tur hnai vai ber an ni a, kan Kohhran pawhin kan dawng thut thei a ni.

Lawrkhawm

Tun Nilaini zân inkhawm khan thunun tawk mi pali te lakluh an ni a, hemi rual hian UPC atangin member pakhat kan kohhranah lawm luh a ni bawk. Kohhran tan mi tangkai tak ni turin kan beisei a ni.
Soldiers For Christ Team-te chuan tunkar lo awm turah hian Lawipu kohhranah Gospel Crusade an nei ang, kan kohhran atangin Nl Lalhmangaihi Sailo leh Pu Reuben V.R. Beiseia te an tel ve ang. Tin, Krista Thupuangtu Team-te pawhin August ni 13 atang hian Mualvûmah Gospel Crusade an nei bawk ang a, kan kohhran atangin Tv C. Malsawmzuala leh Pu Chalhmingthanga te an tel bawk ang.
Ramthar Committee chuan Dibong-a biak in sakna tur thawhlawm ip kohhran in tinah a rawn sem dawn a. Kohhran mipuite pawhin kan theih ang tawkin tan i lo la ang u.
Beihrual thla a hnai tawh a, Kohhran chuan Beihrual thla hman dan tur a ruahman tawh a. September 5 leh 12, Thawhtanni zante hian KTP ten an inkhawm pangngaiah Beihrual thupui an zir ang a, September 6 leh 13, Thawhlehni zanahte Kohhran Hmeichhia ten Beihrual thupui an inkhawmah an zir ang. September 21-25 chhung hian Kristian Chhungkaw Campaign neih a ni ang a, speaker-ah Rev. Vanlalbela hman a ni ang. Tin, December thla hian kan Kohhran chuan Evangelistic Team, Upa LH Rohmingliana hmanga crusade neih a rel bawk.

KTP COMMITTEE VAWI 9-NA

August ni 11 zân khan Kohhran Committee Room-ah KTP committee vawi 9-na neih a ni a, chuta thurel hrang hrang te chu-
1. Mission Veng Branch ten ‘Veritas Workshop’ an buatsaih turah Branch KTP-te chu tel ve tura an sawm angin Pu Lalthangvunga Sailo Branch Secretary leh Tv Rochungnunga Committee member-te chu tel ve tura ruat an ni.
2. Aizawl East Presbytery Meet thlengtu tanpui nan Branch Committee chuan Rs 1,000 pek ve nise a ti.
3. Central KTP atanga HIV/AIDS dona kawnga buaipuitu tur bik inruat tura ngenna lo kalah Tv Rochungnunga Branch Committee member chu hemi atan hian ruat a ni.
4. Branch KTP dincham (Branch Day) Oct ni 22-a lo thleng tur lawm dan tur chungchang ruahmanna hetiang hian siam a ni:-
i) Activities Calendar-a lo dah tawh angin Branch Day-ah hian Thisen pêk (Blood Donation) runpui neih a ni dawn a, a pêkna tur atan Presbyterian Hospital Durtlang chu thlan fel a ni a, hemi ni hian a remchan chuan Blood donation Campaign neih tum a ni bawk.
ii) Branch Day lawmna pualin thalai pual bik deuha Crusade neih ni se tih a ni. Kohhran Committee-ah thlen leh phawt tur a ni ang.
5. Branch Committee-in a lo rel tawh zaipawl hla zirnaa Group kal tha ber kum chanve lawmman pêk chu a hun atan Matthaia Group Nite, August ni 29-ah ni se tih a ni.
6. KTP hminga Ramthara kutthlak tih chu Ramthar Committee-te zai ngai zelin kum tawp lamah Work Camp nei thei tura beisei a ni.
7. Kohhran Secretary hnen atanga thu dawn KTP Inkhawm hun September ni 5 leh ni 12 zânah te Beihrual thupui zir tih chu zir tur a rel a ni.

Aizawl East Presbytery neih a ni dawn ta

General Conference neih loh kuma neih thin, KTP Presbytery Meet chu Aizawl East Presbytery chuan tunkar Zirtawpni zan atang hian Salem Veng Kohhran Biak Inah a nei tan dawn a. Thupuiah ‘Thalaite Kohhran Nghahfak’ tih hman a ni a, Rev. Zosangliana Colney, Executive Secretary i/c KTP chuan a sawi ang.
Tun tum hi meet vawi hnih hmanna tur a ni a. Synod Inkhawmpui chuan KTP Presbytery Meet hi KTP General Conference kum khat dana neih a nih tak avanga nei turin a rel a. Kum 2009 atang khan Mizo Synod hnuaia Presbytery hrang hrangte chuan Presbytery Meet hi an hmang tan a, kumin hi a vawi hnihna tur a ni. Kristian Thalai Pawl Aizawl East Presbytery Meet hmasa ber kha Republic Kohhranin hneh takin an thleng a ni.

KTP Aizawl East Presbytery Meet programme thenkhat:
Aug 12 (Zirtawpni) dar 7:00 pm : Palai Lawm & Report
Hruaitu : Pu Lalbiakkaia Sailo, Chairman
Reports : Bial tin Secretary & Presbytery Meet Secretary

Aug 13 (Inrinni) chawhma dar 11:00 : Leadership Training
Hruaitu : Pu K. Lalremsanga, Comt. Member
Thupui : Hruaitu Mawhphurhna
Sawitu : Pu R. Lalhmingthanga, CKTP Comt. Member

(Inrinni) chawhnu dar 1:30 : Thupui Zirho
Hruaitu : Pu Vanlaltlana, Comt. Member
Thupui : Thalaite leh tunlai khawvel
Sawitu : Pu Lalnghinglova Hauzel, CKTP Comt. Member

Inrinni zan dar 7:00 : Pathian Biak Inkhawm
Hruaitu : Tv. Thangliana, Fin. Secretary
Thusawitu : Rev. Zosangliana Coney, Speaker
Thupui : Thalaite Kohhran Nghahfak

Inrinni zan inkhawm bân atangin Fellowship Programme a awm ang:
Inrinni zan Fellowship
Hruaitu : Pu Lalremsiama, Comt. Member
Solo : Nl. Melody Zothansangi, Republic Vengthlang
Live Band : Venghlui Br.
Female Voice : Upper Republic Branch
Solo : Nl. Lalnuchhungi Sailo, Bethlehem Venglai
Musical Drama : ITI Vengchhak Branch
Kan Kohhran Zaipawl chu Pathianni chawhnu inkhawma zai tura beisei ka ni. Inrinni chawhma leh chawhnu programme te hi Branch tina Branch Committee Member chinte pual a ni a, ngai pawimawh theuh turin kan inngên a. Kristian Hla Bu leh 2010 KTP General Conference Hla Bu hman a ni ang.

July thla Kohhran Sum

Bial KTP hruaitute Training

Kum 2011, KTP Rorel Inkhawm, Bethlehem Kohhran Biak Ina neihin a lo rel tawh angin tunlai hian Zoram hmun hrang hrangah Bial KTP hruaituten training an nei mek a. He training-ah hian Presbytery 3/4 huam chhunga thalai hruaitute pualin hun hman thin a ni a. Keini Presbytery tel vena pawh ni 5.8.2011 (Zirtawpni) khan Aibawk Presbyterian Kohhran Hall-ah he training hi neih a ni. Pastor bial 19 atangin Bial thalai hruaitu mi 115 an tel thei.
Training-ah hian heng thupuite hi zirho an ni:
1. Kristian Thalai Pawl sum vawn dan inkaihhruaina
Ziaktu : T/Upa Lallianmawia, CKTP Comt. Member
2. HIV/AIDS chungchang
Ziaktu : Pu Lallianzuala, Consultant (UNICEF), MSACS
3. Branch, Bial leh Central thawhhona chungchang
Ziaktu : Tv. Vanlalhruaia, CKTP Comt. Member
Tlaiah a thlengtu kohhranin training kalte pualin zanriah an buatsaih bawk.

July Thla Faith Promise

Gourp leh Challenger sum Audit

Pathianni hmasa tlai dar 3:00 khan Group KTP leh Challenger sum kum chanve audit neih a ni a, sum fel taka vawn vek a ni. January atanga July 2011 chhunga Group leh Challenger sum dinhmun:

Naupang SS Inkhawmpui

Ni 27, July, Nilai zan Inkhawm bân khan kan Kohhran Sunday School Committee chu Kohhran Committee Room-ah thut a ni a, hetah hian Bial Sunday School Committee atanga Naupang Inkhawmpui chungchanga hriat tur tul lehkha lokal te sawihona hun leh Naupang Inkhawmpui inbuatsaihna atana Department tinte sum mamawh zat tur chungchangte relho a ni.
Department tin ten an sum mamawh zat an sawi chu Kohhran Committtee lamah thlen leh phawt tur a ni ang. Intihsiakna hun tur leh hmun tur chu hetiang hi a ni ang.

Beginner
A hun: Sept 11, 2011 @ College Veng (10:00 am)
Inter & Sacrament
A hun: Sept 11, 2011 @ College Veng (1:30 pm)
Primary
A hun: Sep 11, 2011 @ Venghlui (10:00 am)
Junior
A hun: Sept 11, 2011 @ Venghlui (1:30 pm)
Senior
A hun: Sept. 18, 2011 @ College Veng (10:00 am)
Chawhma leh chawhnu Inkhawmah hian thawhlawm a awm zel ang. Naupang inhriatpawlh a awm theih avangin Beginner leh Primary Deptt tan rawng hrang theuhin badge siam a ni ang a, College Veng Kohhran - Rawng hring, Venghlui Kohhran - Rawng sen, Aizawl Kohhran - Rawng pawl te a ni ang. Mimal item nei turte chu August ni 14 aia tlai lovah mahni Kohhran Sunday School Secretary-te hnenah Deptt tin ten hriattir ni se. Senior Meet chu kal thata inel tur a nih avangin Sept ni 4 Sunday School Total enrollment chu hemi ni vek hian SS Secretary-te hnenah ziaka thehluh tur a ni ang. Endiktu leh Tabulator turin Kohhran tin atangin mi pahnih theuh ruat tur a ni a, keini Kohhran atanga tel turte chu ruatfel an ni tawh a ni.
Senior Deptt hi meet anga a kal dawn avangin an sum mamawh pawh tam deuh tura beisei a ni. Naupang Inkhawmpui huna inkhawm tantu turte chu mahni Deptt-in an ruat dawn a ni.

Pem dawnsawn

Nilaini zan inkhawmah khan pêm dawnsawn a ni a. Pi Lalbiaknemi te chhungkua chu Chhinga Veng East Kohhran atanga kan Kohhrana an rawn pêmna lehkha chhiar chhuah a ni. Upa Bial 7-naah an khawsa mek a ni.

R. Lalmuanzovi thlah

Tun Pathianni chawhnu khan Nl R. Lalmuanzovi d/o R. Sangkunga leh a thian te Orissa state-a missionary-a kal turte chu Dinthar kohhran Biak Inah thlahna hun hman ni.