Ramthar Ni

31 (Nilaini) hi Ramthar Ni a ni a, Mizoram Presbyterian Kohhran tan Ni pawimawh bik a ni. A chhan chu Mizorama Presbyterian Kohhran rawn dintu Rev. David Evan Jones (Zosaphluia) Mizorama rawngbawl tura a lo thlen ni a nih vang a ni.

Kum 1972-a Mizoram Synod Inkhawmpui chuan, Synod Ramthar Board-in, ‘August ni 31, Pu Zosaphluia Mizorama a lo thlen ni hi Synod Ramthar Ni atan hman ni se’, tia a rawtna chu pawmin kum 1973 atang khan August 31 chu Ramthar Ni atan hman tan a lo ni ta a ni.

Mizorama Chanchin Tha rawn thlentu hmasa ber (Pioneer Missionary) Rev. William Williams chuan Khasi rama a thawh laiin Syhlet lama Mizo lung in tângte hnen atanga Mizote chanchin a lo hriatin Mizorama kal duhna a nei ta a. Kum 1891 March 20 khan Aizawlah a lo kal a, Mistiri leh kut hnathawka inhlawhfate hnenah Pathian thu hrilin tract te a sem a. Mizoram chanchin hi Welsh ramah a zu sawi a, Welsh Presbyterian Mission chuan kum 1892-ah Mizoram chu Missionary tirh luhna atan a thlang ta a. Rev. William Williams hi tirh an tum a, mahse vanduaithlak takin a thi ta mai si a. Mi thar an dap leh a; Theological College-a an zirtir chhungin hun a lo vei hman a. Hetih lai hian Arthington-a mi tirh Rev. F.W. Savidge (Sap Upa) leh Rev. J.H. Lorraine (Pu Buanga) te kha an lo chhuak a, kum 1894, January 11-ah Mizoram an lo thleng a; Welsh Presbyterian Mission tirhin Rev. D.E. Jones (Zosaphluia) hi kum 1897, August 31-ah a lo thleng ve leh ta a ni.

Arthington Aborigines Mission dintu Robert Arthington hi Quakers zirtirna pawm mi a ni a. He zirtirnaah chuan khawvela Lal Isua a lo kal thuai dawn niin an sawi a, hei vang hian Arthington-a missionary tirhte hi hmun khatah an awm rei ngai lo. Robert Arthington-a hian chhandamna chungchanga John Calvin-a zirtirna a pawm thui hle. Ruatlawk Thurin ringtu a ni a, Pathian hian thlan bik a nei niin a hria a. Missionary a tirh chhuah te pawh hi, a ngaihdanah chuan, Lal Isua hre lo hnamte hnenah Pathian thu an sawi ang a, Pathianin a ruatlawkte chuan an lo ring nghal mai dawn niin a ngai a ni. Zosaphluia hian Pu Buangate pahnih hnen atang hian Mizo tawng tam tak a zir a, ni tin Mizo tawng thumal sawmnga a thiam hman thin niin, Pu Buanga chuan a ziak.

Arthington-a missionary tirh pahnihte leh Zosaphluia te hi thla eng emaw zat chu an inhrawn hman a. Pu Buanga'n a log bu-a a ziak danah chuan, Zosaphluia Mizorama rawn chhuak hian bungrua a ngah hle a. Thil lei mai mai tur a awm dawn lo tih hriai, sahbawn phei chu tam tham tak a lei lawk a. Pu Buanga leh Sap Upa te awmpui, Mizo mipa naupang chuan chûng sahbawn zo zai, Pu Zosaphluian amah chauha a hmang zo tura a ngaih chuan, dam rei tum hleah a ngai a ni. Hetih hunlai hian sahbawn tlang khat hi Mizo chhungkaw pangngai chuan kum khat chuangte an hmang thin.

Mizoram Presbyterian Kohhran chuan kumin Ramthar Ni pual hian tum khat inkhawm atan chauh programme a siam a, thupuiah ‘Lal hna i thawk ang u’ (Ezek. 3:4-9; Mat. 28:16-20; II Tim. 4:6) tih an hmang ang.