K.Ṭ.P Thupui Innghahna

Thil ṭha ti atân Krista Isuaah chuan siama awmin, ama kutchhuak kan ni si a; chu thil tha tih chu kan awmna tûrin Pathianin a buatsaih lâwk a ni. (Ephesi 2:10)

Tuesday, March 29, 2011

Evangelical Nite hman a ni

Nizan, Thawhtanni zan khan Evangelical Nite hman a ni a, a hlawkthlak hle. Evangelical Nite hi Evangelical Cell te rawtna atanga neih a ni a. Inkhawm hi Tv. C. Lalruatsanga, Evangelical Cell Chairman-in a kaihruai a, Pu F. Krawschhuanga'n hun hmangin, Branch Committee member-ten member-te lu chunga kut nghatin an tawngtai a. Tawngtai lai hian Evangelical Cell member-ten thlan bik hla hmangin zai an hruai reng a ni. He hunah hian mi 107 kan inkhawm.

Sunday, March 27, 2011

Insuk hnatlang neih a ni

Kumtir atanga lo rel tawh, Blanket sûk hnatlang chu tun Inrinni (March ni 26) khan kum danga kan lo insûk tawhna thin, Sihhmuiah neih a ni a, mi 60 vel kan kal thei. Kal nan hian Secretariat Mini Bus leh Pu H. Thangtluanga te 407 truck hman a ni a, blanket hi 130 vel sûk a ni. Tlaiah, insûk zawh hnuah ruah nasa taka a sûr avangin blanket sûkte an ro hman lo nasa hle a, two-wheeler-a kalte an huh zawr haw nasa hle.

Varansi Mission Prayer Network din

Varanasi Mission Field Director Rev. S. Lalkhuma leh Upa Pangthuama te hovin 31.1.2011 (Thawhtanni) zan khan Varanasi Mission Prayer Network, College Veng chu din a ni a. Kum 2011 chhung atan he Network hruaitu turin heng mi te hi ruat an ni: Chairman : Pu Lalchhuanmawia Secretary : Pi F. Laltanpuii Treasurer : Pu C. Lalbiakkima Advisers : Upa Lalmanliana & Upa K. Sangthuama Committee member 16 an awm bawk Collector atan heng mite hi ruat an ni: Pi Lalthankimi Pi Lalpuntiri Pi Lalremthangi Pi Lalrochhuangi Pi Vantleipuii He Prayer Network hian fianrial tawngtaina bakah thla thar Inrinni hmasa ber inkhawm bân apiangin tawngtaihona nei tura ruahman a ni a, a hmun atan Pu Lalchhuanmawia in chung a ni. Varanasi rawngbawlna atan thilpek emaw tawngtaihonaa tel ve tur hian veng mipuite a duh apiang sâwm kan ni a, a chunga hming tarlante bakah heng Phone No. ah te hian inhriattir theih reng a ni e: 9436156942/ 9436193131/ 9862647105

March thla Faith Promise

Friday, March 25, 2011

YMA blogspot thar

YMA, College Veng Branch chuan blogspot thar an nei ta a. Veng chhung chanchin hre duh tan tlawh theih reng a ni.
www.ymacollegeveng.blogspot.com

Wednesday, March 23, 2011

KTP Chhimtuipui Presbytery Meet

KTP Chhimtuipui Presbytery Meet vawi 2-na chu March ni 18-20 chhung khan Saiha Kohhran Biak Inah neih a ni a. Palai riak lut mi 214 an awm a, lawng hmang te-a kal ngai Khaikhy Branch chu km 250 vel atanga rawn kal niin, a hla ber an ni. Bungtlang South leh Vathuampui bial atanga kal tam zawkte chu ke-in an kal a, motor kal theihna chin atangin 407 hmang leh Sumo hire-in Saiha hi an pan a, Bungtlang South Bial hian an sum neih zawng zawng chu Meet-a kal nan hian an hmang a, misawnari ten an rawn ho a ni.
Presbytery Meet-ah hian Rev. Dr. C. Chawnghmingliana, A/S Chhim Bial (Lunglei) chu Speaker a ni a, ani hian Meet Thlarau lam thupui- 'Kristian Nun' (Phil. 1:21) tih tum 3 a sawi a ni. Speaker hi a nupui leh a fapa-in an rawn tawiawm a, Presbytery chhunga Pastor 3 leh Pro. Pastor ten an uap bawk.
Zaia rawngbawlna nei tura sawm- Presbyterian Choir, Lunglei te, Nl. Margaret Malsawmzuali (Maggie of MSVT, Aizawl) leh Tv. Freddy Lalremruata Sailo (Electric Veng, Aizawl) ten hun an hmang bawk. Inkhawm apiangin Kohhran Zaipawl leh Bial Zaipawl 2-3 a awm thei ziah a, zai boruak a nuam a, lamtual an khah vek bakah mahni awmhmuna lam an thahnem thei hle. Pathianni zan inkhawm hi mi 630 an tling a, Biak In a khat hneh a, chanvo neite inkhawm zawng zawngten an hmuh kim theih nan LCD Projector hman a ni a. Meet hi khamlo takin Pathianni zan dar 12:30-ah a tiak a ni.
Chhimtuipui Presbytery-ah hian Pastor Bial 5 a awm a, chungte chu- Saiha, Lawngtlai, Lawngtlai Chanmari, Bungtlang South leh Vathuampui te a ni. Branch 33 a awm a, member zawng zawng hi mi 1,600 vel a ni a, thawhtan zan inkhawm hi 32% a ni bawk. Inhlawhna tur a van bakah, member hi an tlem a tawngtaipui an ngai a. Synod Home Mission rawngbawlna hrang hrang- Bungtlang South, Hmawngbu, etc.-ah work camp-a thawh tur a tam hle.

Monday, March 21, 2011

Branch Committee neih a ni

Thawhtanni (March ni 14) zan inkhawm bân khan Kohhran Committee Room-ah Branch KTP Committee vawi 4-na neih a ni a, hetah hian Blanket sûk chungchang leh KTP Sports chungchangte ngaihtuah a ni.

Blanket sûk hi tun Inrinni, March ni 26 hian sawn a ni a. Hemi nia tihtura lo ruahman - Retreat cum Leadership Training, Group leh Branch Committee puala neih tura tih chu hun remchang dangah sawn a ni.

KTP Sports neih hun tur leh neih dan tur ngaihtuah a ni a. Committee hian a hun leh neih dan tur chungchangah thutawp siam lovin, a ngaihtuahtu tur Sub-Committee a siam a, anni hian ruahmanna an lo siam ang a, Committee-ah enho leh a ni ang. Sports Sub-Committee member-te:
Chairman: Pu Lalthangvunga Sailo, Br. Secretary
Secretary: Tv. C. Lalruatsanga, Br. Asst. Secretary
Committee member-ah Branch OB te leh group tin Leader-te ruat an ni.

Member-ten KTP Sports item atana duh leh tha kan tihte Sub-Committee member-te hnenah hriattir theih nise a lawmawm hle ang.

Zoram pum huap Pavalai Inkhâwmpui

Inrinni zan (March 19) atang khan Zoram pum huap Pavalai Harhtharna Inkhâwmpui chu Mission Vengthlang Kohhran Biak Inah neih tan a ni a, zanin hian a tiak ang. He khâwmpuiah hian Rev. Vanlalbela chu Speaker a ni. Kan veng Pavalai Pawl pawhin zaipawl neiin, nizan khan an rem thei a ni.

Tun tum Pavalai Inkhawmpui hi Zoram pum huapa vawi 2-na a ni a, nikum khan Chanmari Veng Kohhran Biak Inah neih a lo ni tawh a, boruak a nuamin tel leh chhim an thahnem hle a. Pavalai pawl hi Mizoram pumah chhinchhiah hnuhnung berah 240 a awm tawh a, din thar zel a nih avangin a zât chiah hi a hriat hleih theih loh va, tunah chuan hei aia tam tawh tura ngaih a ni. Mizoram Synod-in Pavalai Pawl chungchang hi a zir chiang mêk a, kumin kum chanve bâwrah hi chuan Pavalai Pawl chungchanga Synod hmalak dan tur a chiang thei ang.

Thu sepsel

  • Kan member Reuben VR Beiseia te, Soldiers For Christ team te chuan Lawipu Vengah rawngbawlna an neih chu tluang takin an zo va. Ni 26, Inrinni atanga April 3 chhung hian Lungchhuan Kohhranah crusade an nei leh dawn a, Pathian hnenah i dîlpui zel ang u.
  • Kan Biak In enkawltu Pu C. Lalfakzuala chu Presbyterian Hospital, Durtlang atangin dam takin a lo chhuak leh ta a. Kan tawngtainaah i dilpui zel ang u.
  • Kan Kohhran mi, Pu Chalhmingthanga leh Tv. C. Malsawmzuala te team, Krista Thupuangtu Team te chuan Tuahzawlah Crusade neiin nimin khan an kal a. I tawngtaipui ang u.

Sunday School zirtirtute inhmukhawm

Zirtawpni zan (March ni 18) khan kan Kohhrana Naupang Sunday School zirtirtute leh kan Kohhran Sunday School hruaitute nen hun hmanho a ni a, Sunday School hmasawnna tur chi hrang hrang ngaihtuahin, hmalak dan turte thlirho a ni.

He inkhawm hi Upa F. Zakhuma, Sunday School Superintendent chuan a kaihruai a, Pu R. Zapliana’n Sunday School inkaihhruainaa thil tulte chhiar chhuakin, Upa Romawia, Kohhran Chairman-in thu a sawi. He inkhawmah hian hmalakna tur leh Sunday School hmasawnna tur hrang hrang sawiho a ni a. Zirtirtute zingah solfa lama hmasawn a ngai nia hriat a ni a, hei vang hian zirtirtu solfa zir duh apiang chuan mahni awmna Dept.-a leader hnenah inhriattir nise, a tul dan azirin solfa camp emaw class emaw neih nise, tia rel a ni. Naupang enkawl kawnga discipline tha zawk a awm theih nan Dept. tin atangin zirtirtu kal hma tur pahnih vel inruat thin tura rel a ni a, naupangte Kohhran inkhawmah item a zing thei anga neihpui nise, tih a ni a. Zirtirtute Kohhran inkhawm ngai pawimawh lehzual tura infuih thar a ni.

Biak in leh a chhehvel nungchang kan hriat a, Biak in zahawmna kan humhim lehzual theih nan nu leh pate kan fate theuh, Biak in zahawmzia leh Biak ina awm dan tur inzirtir ngun leh zual nise, a duhawm hle.
Department hrang hrang zirtirtu kal dan:-
Beginners: Ztu-18, K-13, KL-5; Primary: Ztu-21, K-19, KL-2; Junior:Ztu-22, K-20, KL-2; Intermediate: Ztu-16, K-8, KL-8; Sakramen: Ztu-9, K-8, KL-1; Senior: Ztu-20, K-17, KL-3;
Zirtirtu z.z.- 106, Kal- 85 & Kal lo- 21. Zirtirtu kal lo pha 17 an awm.

Saturday, March 12, 2011

Lawrkhâwm

  1. March ni 10, ningani tlai dar 4 atang khan Upa Lallianmawia, Khatla East chu speaker-a hmangin kan Kohhran chuan Tleirawl Pual Camping a buatsaih a, camper 138 an awm. Hetiang hi campers dinhmun a ni:- Senior- m 56 & h 37: t.t. 93), Sacrament m 14 & h 17, t.t.: 31 leh Intermediate m 3 & h 11, t.t.: 14; Mipa z.z. 73, hmeichhia z.z. 65, an vaiin 138. Upa Lallianmawia hi a team member pangaten riakin an rawn tawiawm bawk. Evangelical Cell te camping neih chhung zawng hian tawngtai Khawl anga awmin, VC House-ah tawngtaiin camper-te leh Speaker leh a team te tan hian an lo tawngtai thin a ni.
  2. KTP General Conference neih loh kum apianga neih thin, CKTP Rorêl Inkhâwm chu March ni 11, zirtawp zan atang khan Bethlehem Kohhran Biak Inah neih tan a ni ta. Inrinni nilengin rorel a ni ang a, Pathianni zanah a tiak ang. Kan branch aiawhin Tv. Lalmawizuala Tochhawng, Br. Comm. Member a palai a ni. Hun hman dân tur hre duh chuan hetah ; Central KTP Secy report hei, Report khaikhâwmna pawh, tin bulletin 1 & 2. Rorel minute i chhiar duh chuan hetah
  3. Challenger Issue 11, March ni 13 chhuak hetah hian chhiar tur a awm e.

Monday, March 7, 2011

Pavalai Pawl

Pathianni zan khan kan Kohhran Pavalai Pawl chuan Pastor sâwmna angin Aizawl Kohhranah, Pastor Bial fan programme-ah telh an ni a, zaia rawngbawlna an nei.

Kum 2010 August khan Kohhran Committee remtihna leh phalnain College Veng Pavalai Pawl chu din a lo ni ve ta a. Hruaitu turte inruatin, OB ten Committee member 34 an ruat nghal a, member pawh 94 ngawt an inpe nghal a ni. Pavalai Pawl Hqrs lam pawh hriattir nghal an ni a, lawmthute inhrilhin, Headquarters lam pawhin chanvo pawimawh tak tak an pe nghal a. Kum 2010 August-a din chuah ni mah se, Area Meet bakah Electric Veng Kohhran leh Venglai Kohhranah te sâwm nghal an ni. Hei bakah hian Chaltlang Kohhranah Aizawl Town Area Carol Service-ah pawh zaipawl nei tura sawm an ni a, kohhranin bus tumsakin, hla an rem a ni.

Saturday, March 5, 2011

SUNNA

Tun mai 05/03/2011 (inrinni) zan dar 11:45 khan Pu Thanzauva f/o Pu rozama chu an chenna Inah Thaw hah avangin a boral. Mitthi Chhungte kan tawrhpui tak zet zet a ni. Nak tuk 06/03/2011(Pathianni) 12:00 Noon ah Vui a ni ang.