MPF & Political Party-te Thawhhona Thuthlung

MIZORAM PEOPLE FORUM LEH POLITICAL PARTY HRUAITUTE
AIZAWL MUNICIPAL COUNCIL INTHLAN 2010 ATANA
Thawhhona Thuthlung

Aizawl Municipal Council inthlan hi thianghlim leh felfai taka neih ngei ni se. Vote nei thei dik takte chuan vote thlak theuh ni sela; tharum hmanga mi vau, tih thaih leh sawrkar hnathawk vaubehte hi tih loh ni se. Inthlanna hi boruak zalen leh muanawm tak hnuaia neih a nih ngei theih nan Mizoram People Forum (MPF) lehPolitical Party hrang hrang ten inthlan chungchangah thawhhona thuthlung neia hma lakho kan remti a. Hetiang hian ‘Thawhhona Thuthlung’ kan siam a, hei hian Aizawl Municipal Council inthlan hun puan atangin inthlan zawh fel thleng a huam ang.

1. Inthlan senso chungchang :
i) Inthlan hautak leh senso sang lutuk awm lo turin theihtawp chhuah theuh ni se.
ii) House to house campaign hi thil dik lo tam tak inphumruk theihna leh senso siam theitu a nih avangin tih loh nise. Amaherawhchu mipuiten candidate-te hmel kan hmuh duh vang emaw candidate-ten tlawh duh bik an nei emaw a nih chuan MPF Local Forum hriatpuina in programme siam thin ni se, zan rei tak thlenga tih loh ni se. Political Party hminga kawngzawh pawh hi tih loh ni se.
iii) Sum leh therhlo hmanga vote lei leh hralh hi tih loh ni se.
iv) Ruaitheh leh picnic hi tih loh ni se.
v) Candidate-te tana inthlan tihautaktu, heng banner, flag leh poster-te hi tar zat tur veng tina Political Party hrang hrang hruaitute leh MPF Local Forum hruaituten bituk ni se.
vi) Mipui, pawl hrang hrang leh kohhrante pawhin Political Party leh Candidate-te hnenah thil phut neih tur a ni lo. Chutih rualin thil chi hrang hrang (entirnan - PA set, silpaulin, jersey, football, mobile handset etc.) sem loh ni bawk se.

2. Policy implementation leh candidate chungchang :
i) A tak ram thleng thei tur leh tihhlawhtlin theih tur, policy leh programme duan ni se.
ii) Mimal chungchanga thudik ziktluak lo hmanga inbeih loh ni se; Party policy leh programme hi campaign-na leh inzawrhna atan hman ni se.
iii) Dawt leh thu belhchian dawl lo leh finfiah theih loh hmanga inbeih loh ni se.

3. Candidate chungchang : Political Party tinin Candidate an siam laiin hetiang mi hi candidate atan ruat tura beisei an ni.
i) Mi hmingtha, mize nghet leh rilru puitling
ii) Mi taima leh rinawm
iii) Dik lo leh kut tling lova sum leh thil dang hmuh tum lo mi
iv) Zu leh ruihtheih thil dang laka fihlim
v) Mipat hmeichhiatna kawnga mi hmingtha
vi) Ram leh hnam dan pawisa mi leh dikna ngaisang mi
vii) Khawtlang leh mahni mihringpuite thatna tur duha, chumi atana inhmang peih mi
viii) Mahni sakhua, kohhran leh pawla mi hmingtha leh rinawm

4. Thawhhona chungchang :
i) MPF kaihhruaina hnuaiah, a remchan dan angin, Joint Platform buatsaih a ni ang a. Chhungtinten candidate an lo hmelhriat theih nan leh an thu leh hla an lo dawnsawn theuh theih nan, a theih leh remchan dan angin, he programme hi Local TV-ah pek chhuah ni se.
ii) Inthlan Ni ah vantlang tana thingpui lum hi tih loh ni se.
iii) Polling Booth area bul hnaia electoral roll en leh number pek chhuah hi Political Party-ten a mala buaipui lovin, MPF kaihhruainain, fimkhur taka buaipui ni se.

5. Thawhhona Thuthlung bawhchhia : Heng thawhhona thuthlung hi bawhchhia an lo awm a, finfiah ngei a nih chuan, MPF in a zau thei ang leh a remchan dan angin veng chhung PA system, nitin Chanchinbu, Local TV-etc, ah te a puang zar ang.
Keini, vawiin July ni 9, 2010-a kalkhawm, a hnuaia hming tarlante hian he ‘Thawhhona Thuthlung’ hi tha kan tiin zawm theuh ni se kan ti a; hemi piah lamah hian MPF Local Forum in ruahmanna hran siam loh ni se. Keimahni Pawl leh Political Party theuhah bawhzui tura thehdarh ni se kan ti.
1) Pu C. Chawngkunga, G/S, MPCC, 2) Pu Zasanga, G/S, MPCC, 3) Pu Vanlalzawma, Treasurer, MNF, 4) Pu K. Sangthuama, G/S, MNF, 5) Pu R. Lalhnuna, G/S, MNF, 6) Pu Zosiama Pachuau, Sr. V. President, MPC, 7) Pu Sailothanga Sailo, Treasurer, MPC, 8) Pu Clement Lalrema, Consultant, MPC, 9) Pu C. Laitanga, G/S, ZNP, 10) Pu C. Lalsanglura, G/S, ZNP, 11) Pu R. Lalthansanga, G/S, ZNP, 12) Pu C. Hmingthansanga, Treasurer, BJP, 13) Pu K. Lalchhanhima, G/S i/c Orgn., BJP, 14) Pu K. Zoliana, President Kisan Morcha, BJP, 15) Pu Zokhuma, Executive Member, BJP, 16) Rev. C.Chawngliana, President, MPF, 17) Pu H. Raltawna, Vice President, MPF, 18) Rev. Lalzuithanga, Sr. Vice President, MPF, 19) Rev. Pheitha Lava, Vice President, MPF, 20) Rev. B. Zazawna Lai, Vicce President, MPF, 21) Upa Lalramthanga, G/S, MPF, 22) Dr. Lalbiakmawia Ngente, Secretary, MPF, 23) Pu B. Thangtinliana, Jt. Secretary, MPF, 24) Pi Nunvuli, Treasurer, MPF, 25) Upa Sainghinga Sailo, Fin. Secretary, MPF, 26) Pu Robert Lalchhuana, Adviser, MPF, 27) Dr. Rualkhuma Colney, Adviser, MPF & 28) Rev. Vanlalzuata, Adviser, MPF

Note : Zosiama Pachuau, Sr. Vice President, MPC; K. Sangthuama, Gen. Secretary, MNF; C. Laitanga, Gen. Secretary, ZNP; K. Lalchhanhima, Gen. Secretary, BJP; Rev. C. Chawngliana, President, MPF; Upa Lalramthanga, Gen. Secretary, MPF leh C. Chawngkung, Gen. Secretary, MPCC ten hming an sign a ni. (Source: Synfocity-301)