K.Ṭ.P Thupui Innghahna

Thil ṭha ti atân Krista Isuaah chuan siama awmin, ama kutchhuak kan ni si a; chu thil tha tih chu kan awmna tûrin Pathianin a buatsaih lâwk a ni. (Ephesi 2:10)

Thursday, July 8, 2010

CENTRAL K.T.P THUCHHUAHTE

Central K.T.P Committee chuan Inneih lawmpuina thilpêk chungchânga kaihhruaina leh Relief Budget hman dân tur ruahmanna a siam thar a. June ni 11, 2010-a circular tarlan ang chu heti ang hi a ni:-

INNEIH LAWMPUI CHUNGCHÂNGA KAIHHRUAINA
[Vide 2010 General Conf. Rorêl VII App.III: A(10); CKTP 611: III(5); 612: IV(1); 613: IV(4)]

Central KTP-in kum 2003-a 'Inneih lawmpuina thilpêk chungchânga Kaihhruaina Circular' a lo chhuah tawh chu Nupa chungchâng Dan bu thar bung leh châng tarlan nên inmil lova hriain dah mil tura rawtna a lo lût a. Kum 2010 KTP General Conference Rorêlah 'Dan bu thar bung leh chang mila dahin hmalâk nghal theih turah kan ngai' tia inhrilhfiah a ni a. Chu thu chu bawhzuiin CKTP 611: III (5) chuan siam thata tihchhuah leh ni se tiin a rêl a. Amah erawh chu, Nupa Chungchang Dan lam han ena zir chianin Circular-a bung leh chang dah dan hi hriat thiam a harsa hle mai a. Engtin chiah nge a inkungkaih tih thuah fimkhur a ngai deuh zâwk maha ngaiin, zirchianga ruahmanna siamtu tur mi pathuam ruat a ni a [CKTP 612: IV(1)].
Ruahmanna chu CKTP Committee-ah chhawp chhuakin fimkhur tak leh uluk taka ngaihtuah a ni a. Ram puma kan kal tlân theih dân tur nia ngaiin a hnuaia mi angin a pawm ta a ni [CKTP 613: IV(4)].
  1. KTP Member-in Biak In hawngin Kohhran pâwl dang, Presbyterian Kohhran Nupa Chungchâng Dân Then 1-na Bung I: VI (A, B, C)-in a sawi, an inneihna kan pawm theihte nupui/ pasala nei an awm a, an inneih laia kan member an la nih chuan lawmpuina pêk a remchang thoah kan ngai.
  2. Nupui/ pasal nei chhiarnaah pawh Biak In hawnga inneihah chhiar tel thin tur a ni.
  3. KTP member, Kohhran dang mi nupui/ pasal nei, an inneih hmaa Kohhran pâwl danga inlette chu lawmpuina pêk a remchang lo va, nupui/ pasal nei chhiarnaah pawh telh loh tur a ni.

RELIEF BUDGET HMAN DÂN TUR RUAHMANNA
[Vide CKTP 612: IX (2); 613: IV(6)]

Central KTP Committee-in Relief Budget hman dan tur Office lamin ruahmanna lo siam se tiin a rel a {CKTP 612: IX(2)}. Office lamin chu chu bawhzuiin ruahmanna chu CKTP Committee-ah chhawp chhuakin heti angin pawm a ni {CKTP 613: IV(6)}.

1. A lo chhuah dân leh a tum: K.T.P hi kawng tinrengin kan chein hma kan la zau em em a. Sum tuaka inhlawh te, hnatlang neih hrim hrim te, rawngbâwla zin chhuahte kan nei tam hle a ni. Chunga kan chêtvelnaah chuan vanduaina tawh palh theih niin nunna hial pawh chân an awm thin a. Hêng ang huna Central K.T.P hminga chêtlak ve theihna tur Budget lamah kan neih thin loh avângin bengvar chhuah theih a ni lo va, chu chu a hrilhhai thlakin a fello deuh a ni lawm ni tih ngaihtuahna atanga hei hi rawt chhuah a ni.

2. A huam chin tur:
  1. Branch huap/ hminga zin chhuah leh hnatlang neihin
  2. Bial huap/ hminga zin chuah leh hnatlang neihin
  3. Central huap/ hminga zin chhuah leh hnatlang neihin

3. Pêk tur zât: A chung no.2-naa sawiin a huam chhûnga-
  1. Thi chu Rs. 1,500/- a ral ve thin a ni ang a, a pêk hun chu a remchan dan anga ngaihtuah mai a ni ang.
  2. Damlo/ inhliam an awmin kanna pêk a ni ang a, a zât chu an nat dan/ dinhmun azira bithliah chawp a ni ang.

Note: Sl.No. 2-naa sawi, Branch leh Bial huapa zin chhuah leh hnatlang neiih tuma chesuala vanduaina tâwk palh kan awm chuan Central KTP Office-ah hrittîr nghal thuai ni se la, amah erawh chu tanpuina inpêk thuah fimkhur taka kalpui a ngaih dawn avangin pêk ngei awma Committee-in a ngaih chin chauh report ni se a duhawm khawp ang. Ram pum nghawng thil thleng leh chuti ang ni lem lo, thil te tham ang chi chu kan thliar thiam turah kan ngai a ni. Heti ang vanduaina a thlen loh nân kan chet chhuahna apiangah fimkhur chhuah tlâng theuh turin kan inchah takzet zet a ni.

No comments:

Post a Comment