College Veng Kohhran Hmeichhe Committee chuan kumin chhung hian ramthar Filed - Debong leh a chhehvel tlawh nise tiin a rel a, ni 26.11.2011 ah chhuakin member 14 leh min hruai turin Pu Vankhuma Hranleh kan sawm angin min tih hlawhtlinsak a, kan lawm hle a ni. A hmun chu tlai dar 4 velah kan thleng a, bialtu Pastor Binei Kumar leh Evangelist-te leh kohhranhoten min lo dawngsawng a, thingpuite kan in fel hnuah Pastor hovin inlawmna inkhawm kan nei nghal a, tawngtaihona te kan hmang a, zan lamah erawh chuan inkhawmna kan nei ta lo. Bialtu Pastor a lo inhawng hle a, a programme zawng zawng ti danglamin kan kutah a dah ve a ni.
Pathianni chawhma chu Dibong Kohhranah kan inkhawm a, Pastor hruainain Nl. Hmingthansangin thuchah a sawi a, tanna leh thilpek hlanna thlengin kan chang vek a ni. Inkhawm ban velah kohhran tlawhin Bus-in Pastor te nupa nen apui anawiin kan chhuak a, heng kohhrante hi kan tlawh:-
1) Champanagar Preaching Station - Member 15 vel awmna. An Biak In hi kum 2008-09 khan Vaivakawn Kohhran Hmeichhe kalte thawhlawm atangin leh, a finishing hi Zarkawt Kohhran pek atangin an thawk. Krismas present atan Rs. 1000 kan pe.
2) Jeribam Kohhran - Pastor thuthmun a ni a, member 76 vel an awm. Krismas Present Rs. 1000 kan pe.
3) Chatkol Kohhran - Biak In hi kum 1993-a din a ni a, member 60 vel awmna a ni. Krismas Present Rs. 1000 kan pe.
4) Khakhunou Preaching Station - Biak In hi kum 2008 ah Khawzawl Harmon-in an saksak a, thutthlengte dahin Tirhkoh an dah nghal. Krismas Present Rs. 1000 bawk kan pe.
Heng bakah hian Champanagar Kohhran-a lawi Nungchatpi khuaa mi, Pu Madhu Chandra chu a fapa chhungkaw eizawngtu ber misualin râwng taka an thahsak avangin pawisa thawhkhawmin Rs. 800/- in kan ral a. Anni hi an khua ten ensanin an tui chawi te an phal lova, an thil neih te pawh an laksak thin a, tawngtaipui an ngai hle.
Tin, Nl. Bediamini Evangelist, a inah kan tlawh a, a luahlai chu a tlu tep tawh a, a dang a sa ve leh a, a chung tur rangva kohhran ten tumsak theih a chakawm hle.
Zan inkhawmah Nl. Hmingthansangin inkhawm a hruai a, kan Kohhran tlawhte atanga kan rilru khawihtute kan sawi a, kan lim hle. Krismas thilpek atan Rs. 1500 kan pe a, tin, Pi Lalengzamin an khuang Rs. 2500 a an leithar a ken chu Dibong Kohhranah a pe bawk.
Thawhtan zing dar 5:30-ah lo chhuakin Pailapool Bengali Project Craft Centre leh Biak In kan tlawh a, tin Kamranga (Pu Daniela awmna) kan tlawh leh a, Rs. 1000/- thilpek kan hlan leh. Tin, kan Kohhranin Biak In kan sak Bahadurgram kan rawn tlawh leh a. Tichuan, Silchar-ah L.O Pu James Lalrinchhana S/o Pu C. Thanbuaia te nupain chawhlui min lo siamsak a, an chungah kan lawm hle. Kan veng mi ngei ram danga min ngaihsaktu kan nei hi vannei kan inti hle. Kabugan erawh chu a kawt atanga thlirin kan lut ta lo.
Expenditure
Budget-ah Rs. 25,000/- dah a ni.
Krismas thil pek Rs. 6,500/-
(Kohhran 6-ah)
Ei leh in Rs. 6,860/-
Motor hire-na Rs. 14,000/-
Total Rs. 27,360/-
Report petu: Pi Lamchhingi
REFLECTION:
Pu Madu Chandra-in “Ka fapa lungphun pawh kan duh a, mahse engmah kan ti ngam lo, min ensan a, min tibuai reng a, mahse Lal Isua kan nei a, a tawk e” tia a sawi leh a nupuiin “Kristian ten kan in in rawn tlawh hi kan lawm lutuk, tunah chuan thi mah ila thlamuang takin ka thi tawh ang” a tih khan min hneh hle. - Late-i
An inkhawmna kawng hla tak leh thim hnuaiah pawh hlim taka chhangchhe chung pawha an inkhawm leh inpawlho an ning lo khan min hneh. - Lalsangpuii
Pi Chandra te chhungkaw nunin min hneh hle a, an khua ten ensanin duh lo mah se Isua an neiha an lawmzia leh an zam lohzia khan min hneh. - Remmawii
Ramthar field-a Biak In sakte tul ka lo ti lo thin a, mahse a lo tulzia leh tlawhpawh fo a, tanpui thin an tulzia ka hre thar hle.
- Tante-i
Ringtute leh thawktu ten a takin Pathian an ring a, Pathian thu an awih tak tak khan min hneh, sawi thiam lo mah se.
- Chhingtei
No comments:
Post a Comment