Kohhran News

1. Sakramen exam: Nov. 11 zan khan Gospel Centenary Hall-ah Sakramen Dept chuan Dân chhung luh exam an nei a. Mi 45-in exam hi an bei a ni. Exam te hi Kohhran Committee-in an kâwm leh dawn a, chumi hnuah, Kohhran Committee mit an tlung chuan Dân chhunga lak luh an ni ang
2. Crusade neih a ni dawn: December ni 12 atanga ni 18 chhung hian kan Kohhran chuan Crusade a buatsaih dawn a, Speaker atan Upa L.H. Rohmingliana, Evangelistic Team chu hman a ni ang.
3. Krismas leh Kumthar Committee Puipate: Chairman: Upa F. Zakhuma, Secretary: Pu C. Lalbiaksanga, Assistant Secretary: Pu Zoliana, Treasurer: Pu Lalchhuanmawia & Finance Secretary: Pu C. Lalrosanga

Media hmangin Synod rawngbâwlna

November 7 thawhtanni khan Synod Moderator Rev. C. Lalsanglianan Mizoram Presbyterian Church Synod FM Radio leh TV Programme (Hruaina Êng) tihchhuah tur hawngin Pathian hnenah a hlan. Synod FM Radio leh TV Programme hmingah hian “HRUAINA ÊNG” tih hman ve ve a ni a. HRUAINA ÊNG FM Radio programme hi November 11 (Zirtawp) zan dar 7:30 - 8:00 inkarah AIR Aizawl FM ZOAWI atanga tihchhuah tan a ni a, HRUAINA ÊNG TV programme hi November 13 (Pathianni) tlai dar 3:00 – 5:00 chhungin LPS Vision Channel1 leh ZONET ZAWLBUK atangin tihchhuah tan tura ruahman a ni.

Kum 2012 Sunday School zir turte

Puitling-ah 'Numbers': Rev. H. Lalchhanhima

Senior 'Bu Khatna': Rev. Rosiamliana Tochhawng

Sacramen (Revised & Enlarged): Rev. H. Zalawma & Rev. Vanlalzuata

Intermediate 'Bu Khatna' (Revised & Enlarged): Rev. Vanlalthlana

Junior 'Bu Khatna' (Revised & Enlarged): Upa Dr. R.L. Thanmawia

Primary 'Bu Khatna' (Revised & Enlarged): Upa R. Lalmalsawma

Beginner 'Bu Khatna' (Revised & Enlarged): Revd. Chuauthuama

Masihi Sangati-ah 'Kristiante nun dan tha': Rev. K. Lalpiangthara

Home Mission-ah 'Kristian Nun': Upa Lalhriata

Synod Sum Report

Tunkar khan Synod Executive Committee meeting neih a ni a, hetah hian Rev. Zosangliana Colney, Synod Finance Officer-in April, 2011 - October, 2011 chhunga sum hmuh dan a report. Pastoral Budget pum puia hmuh beisei zat Rs.38,40,43,300 (Nuai sangthum zariat sawmli singli sangthum zathum) ah Rs.25,54,29,946 (Nuai sanghnih zanga sawmnga pali singhnih sangkua zakua sawmli leh paruk) hmuh tawh a ni a, hmuh tawh zat hi za zela 66.51 a ni. Mission Budget pum puia hmuh beisei zat Rs.33,80,48,600 (Nuai sangthum zathum sawmriat singli sangriat leh zaruk) atangin Rs.20,72,82,971 (Nuai sanghnih sawmsarih pahnih singriat sanghnih zakua sawmsarih leh pakhat) hmuh tawh a ni a, hmuh tawh zat hi za zela 61.32 a ni.

Khawvel Sunday School Ni 2011

Khawvêl Sunday School Nî hi Dr. Bailey-a, Tabernacle Presbyterian Church, Philadelphia (USA)-a Kohhran Upa rawt chhuah a ni a. Kum 1907-a World Sunday School Association Convention, Rome-a neih tumah leh, kum 1910-a Washington-a Convention neih tuma an sawi hona bawhzuiin kum 1910 atang khan neih tan a ni a. Mizoram Presbyterian Kohhranin Khawvêl Sunday School Nî a hman tan chu kum 1944 khan a ni. Hemi kum atang hian tun thlengin Khawvêl Sunday School Nî pualin thawhlawm pawh lâk khawm zêl a ni a. Tin, kum 1945 atangin November Pathianni hmasa ber hi Khawvêl Sunday School Nî-ah hman a ni ta zêl a ni.
Kum 2000 atang Naupang leh Puitling S.S. zir tur a hrana siam a ni a. Kumin hian Puitling lamah, chawhmaah Pi Puii (Dr. Gwyneth Parul Roberts) chanchin, Upa Dr. L. Ringluaia ziak, chawhnu lamah Pi Zosaphluii (Katherine Ellen Williams) chanchin, Pi C. Lalneihkimi ziak zir tur a ni (zirlaibu hetah download theih).
Naupang lamah chuan, chawhmaah Tv. Chalbuanga chanchin, Upa Dr. C. Lalrawna ziak leh, chawhnu lamah Corrie Ten Boom chanchin, Rev. C. Chawngliana ziak te zir tur a ni (zirlaibu chu hetah hian).
Kan Kohhranah chuan Naupang hi Group-I (Beginner to Junior) leh Group-II (Intermediate to Senior)-ah te then a ni a. Thupui sawi turte:- Group-I chawhma-ah Pi Rosangliana, Beg. Asst. Leader, chawhnuah Tv. C. Lalruatsanga, Junior Asst. Leader. Group-II chawhmaah Pu Lalthangvunga Sailo leh, chawhnuah T/Upa T.L. Haungura.

November thla chanvo nei te

Meeting Chairman: Upa Romawia
Zai Hruaitute:- Pu PC Lalropara, Pu R.Vanlalhuala & Tv. Lalmawizuala Tochhawng
Keyboardists:- Pu F. Lalremruata & Tv.C.Lallianzova
Thilpek Lakhawmtu (Pathianni zan):- Nl. C.Lalhriatpuii, Nl. VL.Hmangaihzuali, Nl. Baby Lalhmunsangi, Nl. C.Lalbiaksiami & Nl. Lalchansangi
Hla Hriltute:- Pi Rosailovi & Pi.R.Lalpianthangi
Receptionists:- Pu F.Krawschhuanga (Convener), Tv. K.Zonunmawia, Tv. H.Vanlalhriatzuala & Tv. F. Vanlallura
Pangpar Khawitu turte:- Nl C.Lalnunsiami, Nl.K.Hmingsangzuali, Pi Lamchhingi & Pi Vanlalthlengi

Kohhran Hmeichhia:- Thilpek Lakhawmtu: Pi Varthanzami
Zai Hruaitute: Pi Lalropuii & Pi Siamthangi

Kristian Thalai Pawl:- Zai hruaitute: Tv.Rochungnunga & Tv. Andria VL Ruatfela
Musicians: Tv. C.Lalbiaktluanga (Drums) & Tv. Ramluahsanga (Bass)
Hla hriltu: Nl. K.Lallawmpuii
Thilpek lakhawmtute: Nl. H.Lalfakawmi & Nl. Lalthantluangi

October thla Faith Promise

October thla chhunga Faith Promise hmuh zat chu Rs. 22,238/- a ni a, thawhtu zat mi 502 an ni. Mi 1-in Rs. 44/- vel zel thawh ang chauh kan ni a, 81.23% ((Member zat 618) )-in Faith Promise hi kan pe. Thla hmasa (September) kan khûmna hi Rs. 1,108/- a ni.